Informazio gehiago
2019ko Mendi Ibilaldia, 79.a, ekainaren 2an izango da. 45 kilometro eta 1.950 metroko desnibel positiboa dituen ibilbide gogor eta zorrotza da aurtengoa. Irañetan hasi eta Lizarran amaitzen da.
Hasteko, San Donato mendilerroan dagoen Irañetako Portura (800 m) igo behar da, bertako inguru zabalak zeharkatuz, eta Goñiko Gainetatik jarraituta Ikomar ibar zabaleraino iritsi, Andiako Mendilerroan; ondoren, Lizarragako errepidean dagoen Zunbeltzeko ostatu zaharreraino jaitsi behar da.
Zunbeltzetik –hemen hasten da ibilaldi laburra, 24 kilometro eta 760 metroko desnibel positiboa dituena-, Dulantziko tontorrerantz gora egiten du bideak, Urbasa hegoaldeko pagadi eta hariztietan murgiltzeko. Bidean Krezmendi, Larraitza eta Etxeberriko Haitza gailurrak gainditu behar dira. Lizarraldean sartuta jada, Eraulera jaitsi eta Bearinetik igarota, Lizarrako helmugan amaitzen da ibilbidea.
Ohikoa den moduan, autobusak egongo dira Irañetara joateko, baita Lizarratik buelta egiteko ere.